“Ausencias” zuen izenburu Donostia Zinemaldiak 1975eko irailaren 21ean, XXIII. edizioa ixteko hiru egun falta zirela, argitaratu zuen aldizkari ofizialaren bederatzigarren zenbakia irekitzen zuen editorialak. Eufemismoz betetako testu hartan, ez sornerik gabe, “boikot antolatu” hori “rosario de coincidencias” gisa azaltzen zuen. Bertan, errepaso zehatza egiten zitzaien Zinemaldiak gonbidatutako pertsonen absentzia ugariei: ordezkaritzak, zine-institutu eta kazetariengatik hasita, lehian zeuden film talde eta aurretik iragarritako epaimahai kideetaraino.

Gizartearen aldaketen islada gisa, Zinemaldiak egun haietako tentsio politikoa nabaritzen zuen. Abuztuaren 28tik irailaren 19ra bitartean, Zinemaldia abian zela, Francoren Gobernuak hainbat Gerra Kontseilu egin zituen, eta hamaika pertsona, tartean FRAPeko eta ETAko militante batzuk, heriotzara kondenatuak izan ziren. Gipuzkoan eta Bizkaian dekretatutako salbuespen-egoerak, Lege Antiterroristak, greba masiboak eta La Codorniz, Destino edo Triunfo bezalako argitalpenen itxiera edo bahiketak – Zinemaldiaren esparruan ohikoak ziren goiburuak – giro jasanezin horretara gehitu ziren eta nazioarteko elkartasun uholdea sortzeaz gain, Informazio eta Turismoko Ministroak artea eta politika bereiztearen alde egindako hitzaldiarekin hasi zuen Zinemaldiaren hogeita hirugarren edizioari boikota ere eragin zion.

Absentziak ez ziren pertsonenak bakarrik izan, lehiaketara bidalitako pelikulak ere erretiratu ziren. Zinemaldiaren artxiboak telegrama batzuk erregistratu zituen – batzuk oso esplizituak-, non hainbatek Zinemaldira joateari uko egiten ziotela iragartzen zuten. Suediako Zinematografia Institutuaren telegramak “Burgosen Otaegui eta Garmediaren kondenek eragin zuten erreakzio bortitzari erantzunez, suediar filmen proiekzioak bertan behera uztea” agintzen zuen. Honi jarraitu zioten Damiano Damiani eta Mauro Bolognini zinegileen eta Fernando Lara eta Claudio Bertieri zinema kritikarien salaketa telegrafikoak, bai eta François Truffaut, Michel Piccoli edo Joseph Losey zuzendarien azken orduko agendaren bateraezintasun disimulatuak, besteak beste.

“Rosario de coincidencias” hau urruneko geografietara zabaldu zen, baita Europatik kanpo ere. Eta izan zen zuzenenan jaialdiaren gonbidapenei erantzuteari uko egin zionik. Lehiaketako Sail Ofizialean laugarren lankidetza aurkezten zuten John Cassavetes zinegile estatubatuarrarentzat eta Gena Rowlands aktorearentzat bidali zituzten protokolo-gonbidapenak erregistratu ditu lehiaketaren artxiboak, ez horrela horren inguruko erantzunik. Halabeharrak nahi izan zuen Rowlandsek Emakumezko Interpretazio Onenaren Donostia Saria jasotzea edizio hartan, bertan ez egon izanaren arrastoa utziz Zinemaldiaren argazki artxiboan. Amaiera ekitaldian, Gina Lollobrigida aktoreak Rowlandsek A Woman Under the Influence filmari esker irabazatiko saria Procinor enpresari eman zion, Espainiako zinta banatzaileari.