1979an, Pierre Clémenti aktore eta zuzendari frantziarra Donostia Zinemaldiaren Errealizadore Berriak sailean parte hartzera gonbidatu zuten, New Old (1979) filmarekin. Bere bisitaren arrasto nabarmena dago artxiboan. Argazki enblematiko batzuen protagonista izan zen: Victoria Eugenia antzokiko sarreran, Ocañaren besotik helduta. Horiez gain, artxibo nagusiaren 1979-1980.0914 espedientean, hura gonbidatu izanak eragin zuen posta-trukea gordetzen da. Espedientea ohiko dokumentazioarekin hasten da. 1979ko abuztuan, Pilar Olascoaga idazkari nagusiak Clémentiri material batzuk eskatu zizkion, bitan eskatu ere, katalogoan sartzeko: fitxa teknikoa, agiri tamainako hiru argazki, biografia eta filmografia. Erantzunik ez dago jasota. Elipsi baten ondoren, berriz hasi zen posta-trukea 1979ko urrian: zinemagileak, adiskidetsu, jakinarazi zuen bere filmak kalte larriak jasan zituela Donostian eman eta gero, eta koloreko beste kopia bat egiteko kostuak ordaintzea eskatu zuen. Puntu horretatik aurrera, posta-trukea Olascoagaren eta Pompidou zentroaren (filmaren koproduktorea) artekoa izan zen, kopia berriaren kostuei buruzkoa. Idazkari nagusiak, bitan oraingoan ere, film kaltetua bidaltzeko eskatu zion Clémentiri, aseguru-etxeak kalteak ebalua zitzan eta zegozkion kalteak ordain ziezazkioten. Clémentik eskaera horri erantzun ote zion ez dago jasota artxiboan. Baina, 1980ko martxoko sarrera bat dago: Steppenwolf (Fred Haines, 1974) filmaren sustapen-postal bati buruzko ohar bat, eskuz idatzia. Bai eta agiri tamainako hiru argazki ere.